Malapatan, Sarangani Province–Mapasalamaton ang mga opisyal sa munisipyo sa Malapatan, Probinsiya sa Sarangani sa pagpanguna ni Mayor Jun Sumbo sa nadawat niini nga usa ka bag-ong Police Patrol Car nga gikan pa sa PNP National Headquarters.
Pamahayag ni Malapatan Vice Mayor Jean Delos Santos nga dakong tabang ang gihatag nga police car isip dugang pwersa sa peace and order sa munispyo sa Malapatan. Gani awhag niini sa kapulisan nga ipadayon lamang ang pagbantay sa matag lugar sa maong munisipyo aron nga masiguro ang kahapsay ug kalinaw ug maprotektahan ang katawhan sa mga buhat sa mga dautang elemento.
Dugang pagbutyag ni Vice Mayor Delos Santos nga human sa nahitabong kamatayon sa usa ka Barangay Kagawad sa barangay Lun Padidu nga si barangay Kagawad Rene Kamid, kinahanglan ang mas hugtanong pagbantay sa lungsod aron sa ingon mapugngan ang mga criminal sa paghimo ug krimen sa lungsod.
Sa pikas bahin gawas sa Police Patrol car nga nadawat sa Malapatan PNP, bag-ohay lamang usab nga nakadawat ug bag-ong fire truck ang munisipyo sa Malapatan nga gikan usab sa national nga panggamahan.(RV)
