Gikwestiyon sa mga opisyal sa Misamis Oriental ang nahitabong pagkasunog sa mga basura sa Barangay Sta. Cruz, Tagoloan imbis nga andam na kining ibalik sa South Korea.
Mahinumduman nga duna na lamang 5 mil ka tonelada sa mga basura ang nahibilin human mapabalik ang 1, 400 ka tonelada sa milabayng bulan sa Enero.
Ang nahitabong pagkasunog sa mga basura miani og mga pagduda ilabina nga dako ang magasto kung ibalik kini sa South Korea.
Una niini, hugtanong gipatubag sa Sangguniang Panlalawigan ang Verde Soko kung kanus-a ang eksaktong petsa nga ipabalik kini sa SoKor human sa ilang saad nga sa Hulyo 30 mahaw-as na kini gikan sa lungsod sa Tagoloan.
Apan hangtud ning kasamtangan, wala pay aksyon nga nahitabo ug nasunog na lang ang pipila sa mga basura.
Samtang, Pipila usab sa katawhan ang nasuko tungod kay alang kanila, mas maayo pang wala nalang gipriso ang mga mangaykayay gikan dinhi sa Cagayan de Oro kung masunog man lang diay ang maong mga basura imbis nga mapuslan pa.
