Subling magtagbo sa Lunes sa hapon silang Mayor Oscar Moreno, Councilor Romeo Calizo, Police Brigidier General Rafael Santiago nga Regional Director sa PNP sa Northern Mindanao ug uban pang mga Police officials.
Kini aron ilang usbon ang ilang sabot-sabot sa pagpili sa mayor sa himoong Chief of Police sa Cagayan de Oro puli ni anhing Police Col. Nelson Aganon nga namatay tungod sa motorcycle training course Accident.
Matud ni Moreno nga niadtong Miyerkules, Hunyo 19, iya na untang napili si Police Col. Benedicto Pintor isip maoy puli ni Aganon sa COCPO.
Apan matud ni Moreno nga sa wala pa ang Hunyo 19 si Pintor nga Provincial Police Director sa Bukidnon, gikuha sa Intelligence Unit sa PNP sa Campo Crame.
Kini ang rason matud ni Moreno nga wala madayon ang iyang pagpili unta ni Pintor nga iyang ipuli sa katungdanan nga gibiyaan ni Col. Aganon.
Una pa niini, gipahayag ni Councilor Romeo Calizo, Chairman sa Committee on Police fire and Public Safety sa City Council nga niadtong milabayng Hunyo 10 si General Santiago nag-submit sa upat ka ngalan sa Police Col. ngadto ni Mayor Moreno aron pilian sa Mayor kinsay iyang himoon nga chief of police ning syudad.
Matud ni Calizo nga sa upat ka police officials nga gisubmit ni Santiago, si Pintor and napili ni Moreno.
Apan tungod kay si Pintor gikuha sa Intelligence Unit sa PNP Camp Crame si Santiago mag-submit na usab sa lain pang upat o tulo ka ngalan sa Police officials nga qualified nga mahimong chief of police ning syudad.
