Davao City – Giimbestigahan na karon sa Maragusan Municipal Police Station (MPS) ang insidenteng pagbangag sa mga pantyon sa menteryo sa Barangay Mapawa, Maragusan, Davao de Oro.
Sa Facebook post ni Jjee Fernandez Ellorin Jr., gisaysay niini nga samtang nagtaud kini og tent sa gilubngan sa iyang amahan niadtong Domingo (October 17, 2021), nakita na lamang niini nga gipangbangagan na ang pipila ka pantyon, butang nga iyang gikaalarma.
“Unsay trip aning mga tao nga gipangbangagan man ang mga pantyon? Nakita namo ganina while gataod mi’g tent sa gilubngan sa akong amahan,” post ni Ellorin.
Sa interbyu sa DXDC RMN Davao kang Patrolman John Philip Coraje sa Maragusan MPS, ilaha nang ginasayud ang insidente ug ginaimbestigahan kung kinsa ang responsible sa maong panghitabo.
“Advise sa duty investigator namo, ilahang bisitahan unya ilahang imbestigahan pud,” matud ni Coraje.
Kumento sa mga netizens nga basin nauso na usab ang kawat sa tuway-tuway nga nahimo usab nga problema sa lugar sa milabay nga tuig, o bin ba kaha naay gipanguha nga butang sulod sa pantyon.
RadyoMaN Kirby Manzon
