Mamahimo na nga makasulod sa nasud South Korea ang mga pinoy bisan pa man nga wala na’y visa hangtod Abril 2018.
Kini sumala pa sa report sa Yonhap News Agency. Kini ang kabahin lamang sa lakang sa maong nasud aron nga mas mapakusog ang ilahang turismo tungod sa pag-host nila sa 2018 Winter Olympic Games.
Ang kondisyon lang, sa Yangyang International Airport kinahanglan nga mo-landing ang mga turista tungod sa Pyeongchang County pagahimoon ang Winter Olympic Games gikan sa Pebrero 9 hangtod sa 25, 2018.
Gawas sa nasud Pilipinas, tagaan usab og managsamang pabor ang mga turista gikan sa Indonesia og Vietnam.
Kung kahibaloan nga nahagsa sa 60 porsyento ang turismo sa South Korea human nga gimanduan sa Chinese government ang travel agencies nga iundang ang pagbaligya sa tour package didto, tungod sa pagtugot sa US nga magbutang og missile defense system sa ilahang teritoryo.
