General Santos City–Gihingusgan ni Police Supt. Aldren Gonzales ang tigpamaba sa Police Regional Office 12 nga wala gyud sila magkuwang sa paghatag ug pahimangno ngadto sa mga pulis sa Rehiyon 12 nga dili makig-hilambigit sa unsa mang iligal nga aktibidad.
Ang pahayag gihimo ni Gonzales human sa kamatayon sa pulis nga si Po2 Ernie Sagabay kansa namatay atol sa gihimong buybust operation sa Polomolok PNP ug RID niadtong Lunes sa hapon.
Dugang pagbutyag ni P/Supt. Gonzales nga daw sama na sila sa guba nga plaka nga sige ug balik-balik ug pahimangno sa ilang mga kabaro nga likayan ang paglambigit sa droga ug unsa mang iligal nga aktibidad.
Gani bisan ang ilang labaw sa nasudnong kapulisan ug si Pangulong Rodrigo Duterte nagatabang na sa pagpahinumdom sa mga pulis ug uban pang law enforcement agency nga dili mag apil-apil sa iligal nga gimbuhaton.
Apan aduna gyo’y pipila ka mga pulis nga dili gyud papugong sa paghimo ug iligal.
