Mikabat sa 426 ka mga Person Under Monitoring kon PUMs ang nalista sa City Health Office hangtud sa Mayo 3.
Kini nga record sukad gisugdan sa administrasyon ni Mayor Oscar Moreno ang kampanya batok sa coronavirus disease o Covid-19.
Matud ni City Health Officer Dr. Lorraine Nery nga kini nga ihap, nadugangan sa bag-ong 97 ka mga PUMs nga polos naka-close contact sa mga tawong suspect sa Covid-19 nga na-admit sa lain laing government ug private hospital sa Cagayan de Oro.
Gibutyag ni Nery nga nagkata-as ang listahan sa City Health sa mga PUMs ning syudad tungod sa mga tawo nga nahimong Close contact niadtong usa ka 21 anyos nga lalaki nga nagpositibo sa Covid-19 human nadala sa Northern Mindanao Medical Center tungod sa traffic accident sa Barangay Lumbia.
Samtang, matud ni Dr. Joselito Retuya, Epidemiologist sa City Health Office nga lakip sa 426 ka mga PUMs nga nalista sa City Health, 91 niini polos Medical workers sa NMMC, 40 sa usa ka private hospital, 35 ka mga rescuers sa City disaster ug Lumbia rescue groups.
Gidugang ni Dr. Retuya nga ang City Health nakalista usab sa 15 ka mga higala sa labing bag-ong covid positive patient.
