Giawhag kuman sa City Veterinary Office an mga Purok Officials labina mga chairman na tabangan sila sa kampanya batok Rabies. Dungan sa celebrasyon nan Rabies Awareness Month kuman na tuig , tag angkon ni Dr. Allan Quines an City Veterinarian, na tungod sa kadaghan nan mga iro o ido sa nàgkalain laing barangay sa syudad, naglisod o dili madali para mabakunahan an tanan mga ido . Amu na giawhag nila kuman an tabang sa mga Purok-Chairman sa mga Barangay para ma-identify an kada panimayay na nanag-ija nan mga ido.
Sumaya pa ni Dr. Allan Quines, ubos sa ‘Rabies Awareness Month Celebration’ sila nangusog na mabakunahan an mga ido kun diin sila nangajo nan kooperasyon sa mga Purok Chairman na amoy magrecommend for vaccination. “Mas gana gajud kun jaon sila [Purok-chairman] para paspas an amo pagbakuna sa mga ido; kun pwede house to house. More or less 95% or more an mabakunahan sa entire Surigao City, dapat mapadajun na ini– na makuha an mga target,”
Dugang pa ni Quines, na an ila pagpanhingusog na mabakunahan dajun an mga ido para dili na mautro an nahitabo nan jadton milabay na Pebrero kun diin isa ka inahan an namatay human mabangaan nan ido na may rabies .
“Once ma-bangaan sija dapat diretso na sija sa Bite Center o sa City Health Office. Libre an mga bakuna, basta jaoy pay available na tambay sa City Health Office,” awhag pa ni Quines. Sumaya pa na hamok na an mga ido na nabakunahan sa syudad, pero kinahanglan pa gajud na malukop an tanan kay sige man nanganak an iban.
Dugang ni Quines na may P100 na bayad an pagbakuna sa kada ido, apil na ini an ‘dog-registration certificate, dog-tag, sanan vaccination’. An dog-tag makatabang para maidentify an mga ido na tagbakunahan na o waya pa.
