Davao City – Gihangyo sa Davao Office of the City Building Official (OCBO) ang mga residente sa Toledo Building sa Magallanes Residences nga mubakwit na sa maong gambalay human nakahiagom kini og major structural cracks sa mga beams niini.
Sumala ni Engr. Grace Catubig, hepe sa building official, nga ang Toledo mao ang ulahi sa tulo ka mga gambalay nga ginapabakwit ang mga residente human nadamyos sa makusog nga mga linog ug aftershocks.
Gisaysay ni Catubig nga una nilang gipailawom sa yellow code ang maong building diin dunay mga areas nga gikordon ug kinahanglan ayuhon apan atol sa inspeksyon niadtong Enero 17, nasuta nga duna pa kini uban pang damyos rason nga gipailawom kini sa red code nga nagpasabot nga kinahanglan kining bakwitan sa mubo nga panahon.
Gikanayon sa hepe sa building official nga magdepende na sa mga structural engineers sa Toledo kung unsaon nila pag-ayo sa mga damyos una pa man pabalikon ang mga nanag-iya sa units.
Kahinumdoman nga tungod sa nasinatian sa syudad ang makusog nga linog niadtong 2019 nadamyos ang pipila ka mga gambalay diin duha usab sa hilabihang apektado mao ang Ecoland 400 Residences ug ang Palmetto Place sa Maa ning syudad.
RadyoMaN Jason Amisola
