Mga Surfacing Personalities Involved in Drugs sa South Cotabato nga nagpaidalom sa CBRP yara pa lang sa 30 porsyento, pipila nahadlok pa nga magpaidalom.

Yara pa lang sa trenta porsyento ukon 2,004 ka mga Surfacing Personalities Involved in Drugs sa South Cotabato ang tigayon na nga nakaggraduate sa Community Based Rehabilitation Program base sa datos sang Provincial Health Office.
Apang may-yara pa sang 800 suno kay Dr. Rogelio Aturdido Jr. Provincial Health Officer sang South Cotabato ang wala nakaggraduate sa 2,804 nga SPID nga nagpaidalom sa first batch sang CBRP.
Samtang sa banwa sang Tantangan may-yara pa sang masobra dos mil ka mga maggraduate sa Abril 23.
Ang banwa naman sang Banga ang may madamo nga napaggraduate nga SPID sa CBRP, ginasundan sang Sto. Niño kag Surallah.
Sa pamangkot naman kon bala ang mga naggraduate sa CBRP ang wala na gid nagbalik, suno kay Dr. Aturdido indi mapasiguro kag yara na sa Barangay Anti-Drug Abuse Council ang monitoring suno pa.
Ginkumpirmar man ni Dr. Aturdido nga sa masobra 6,600 ka mga SPID ang indi tanan nagpaidalom sa CBRP tungod nahadlok nga posible gamiton sila amo nga ginahangkat nila ang mga naggraduate nga ipalapnag ang kaayuhan sang programa.