Detinado na karon sa Malaybalay City Police Station ang mga suspek nga mitulis sa 62 anyos nga manager sa usa ka Coop sa Malaybalay City, Bukidnon nga nailang si Mr. Medardo Sajonia.
Matud ni Police Chief Insp. Alfredo Ortiz, ang hepe sa Malaybalay City Police Station nga gikan nag-withdraw ang biktima og 5 milyon pesos aron unta gamiton alang sa ilang kompanya, diin ang uban niini gamiton alang sa ilang company outing paingon sa Cotabato.
Dugang pa ni Ortiz, nga posibling gibantayan na ang biktima hinungdang gitulis kini human nag-withdraw.
Nasayran nga pasulod na niadtong higayona sa iyang opisina ang biktima, dihang gipusil kini sa tulo ka higayon nga miresulta sa iyang pag-angkon og samad sa nagkalain-laing bahin sa lawas.
Human sa insidente gilayong misibat ang mga suspek, sakay sa ilang dalang motorsiklo paingon sa wala masayring dapit.
Nakatabang sa kapolisan sa pagdakop sa mga suspek ang mga sundalo sa 8th Infantry Battalion, nga ubos sa 4th Infantry Division Philippine Army.
Gikabutyag nga sa wala pa masikop ang mga suspek, gilakag pa kini sa mga sundalo paingon sa Sumilao ayha sila na-pin down.
Nakuha gikan sa mga suspek ang Granada ug kwarta nga balor 3 milyon pesos, samtang gituhoang ang ubang kwarta ang anaa sa usa ka kauban niini.
Tungod niini, giangkon usab sa mga suspek nga aduna silay grupong gapangbiktima og mga negosyante nga ga-withdraw sa bangko ug lakip matud pa sa ilang nabiktima ang negosyante og corn oil, kinsa ilang gitulis sa Brgy. Tablon ning syudad niadtong miaging bulan.
Gumikan niini, patong-patong nga kaso ang gipasaka sa kapolisan sa Malaybalay PNP batok sa mga suspek nga silang Rolly Bazares, Daniel Buyan ug Oliver Saluday, nga pulos taga-Agusan del Norte.
By: RadyoMaN Ellah Baculio
