Arestado ang duha sa tatlo ka mga suspetsado sa pagkasunog sa Java Pension House sa dalan Locsin-Gonzaga sadtong kaagahon sang Nobyembre 26 nga ginkapatay sang anum ka persona.
Nadakpan ang mga suspek nga sanday Rodolfo Inson alyas Onyok, 23-anyos sang Barangay 40, Bacolod City kag Venancio Valeriano alyas Noy Lumot, 27-anyos sang Purok Kalubihan, Barangay Amayco sa banwa sang Murcia sa gintingob nga pwersa sang Bacolod Police Station 1 kag Murcia Municipal Police Station kaina sang aga.
Gindakup sang otoridad si Valeriano sa Purok Kalubihan, Barangay Amayco, banwa sang Murcia samtang si Inson ang naaresto naman sa Barangay 27, Bacolod City.
May ginatudlo pa karon nga isa pa ka upod ang duha nga ginapangita na sang otoridad.
Suno sa panaysayon sang mga suspek, ang helmet lang kun tani ang target nila nga kuhaon.
Ginsindihan sang mga ini ang strap sang helmet agud makakas ini sa motorsiklo.
Sang nakaguwa na ang suspek sa pension house, nakabati sila sang lupok kag ila nadumduman nga ini ang posible motorsiklo nga ginkawatan nila sang helmet.
Ginbaligya sang mga suspek ang helmet sa balor nga P150.
Base sa record, may kaso na sadto nga pagpangawat ang duha.
Kaso nga robbery ang igapasaka sang kapulisan batuk sa suspek samtang arson naman ang sa bahin sang Bureau of Fire Protection.
Yara karon sa kustodiya sang Police Station 1 diri sa Bacolod ang duha ka suspek.
