MGA TAG-AS NGA DE-KALIBRE’NG ARMAS, SHABU UG MARIJUANA, NAKUHA SA GITAGOAN SA MGA TERORISTA SA LANAO DEL SUR

Na-recover sa militar ang walo ka mga patay’ng lawas sa gitoohang mga membro sa teroristang ISIS Dawlah Islamiya, human ang kapin usa ka adlaw nga operasyon sa Maguing, Lanao del Sur.

Duha sa mga namatay nailang sila si Munaim Kali o alyas Abu Dimam ug Abu Hafs ug usa ka Mahir Sandab nga naila sa alyas nga Abu Jihad ug Telmejie.

Gilubong ang mga namatay didto mismo sa lugar kung asa nahitabo ang engkwentro. 

Sumala ni BGen. Jose Maria Cuepo, commander sa 103rd Infantry Brigade, gawas sa mga patay, adunay mga bahin sa lawas o body parts nga nagkalat sa dapit human sila mangabungkag tungod sa gihimong aerial strike.

Dungan usab niini ang pagka-recover sa nagkalain-lain tag-as nga kalibre sa armas ug bala, kapin kun kulang lima ka kilo sa gito-ohang shabu ug marijuana, mga personal nga gamit, mga gadget ug notebook nga nakasulat ang pangalan sa mga pulitiko’ng target sa grupo. 

Sumala ni Cuerpo nga nakuha ang nasangpit nga mga gamit sulod sa usa ka balay nga naa sa usa ka unrecognized MILF community nga 600 to 700 meters lang ang gilay-on gikan sa gikampuhan sa mga terorista.

Ang nasangpit nga balay, sumala pa, gipanag-iyahan sa usa ka kanhi mayor sa usa ka lungsod sa Lanao del Norte. *

Via |Divina M. SusonMARAWI CITY, LANAO DEL SUR