BACOLOD CITY – Magapatigayon sang committee hearing sini nga adlaw ang Committee on Markets and Slughterhouse agud hambalan ang may kaangtanan sa utang sang mga stall owners sa Manokan Country nga naglab-ot na sa P6.8 million pesos.
Ini matapos man nga nagpadala sang sulat sa Sangguniang Panlungsod ang Manokan Country Vendors Association nga naga-request sila sang committee hearing agud istoryahan kon paano mabayaran sang amat-amat ang ang ila wala nabayaran nga renta sa ciudad.
Gina-ayo man sang grupo nga pwede mahatagan sila sang condonation sa interest sang ila utang agud nga masarangan nila ini nga mabayaran sa amat-amat.
Nahibalu-an nga ginpadala-an na sang notice to pay ang mga stall owners gikan sa City Treasurer’s Office.
Una na nga nagpaandam ni Bacolod City Administrator Atty. John Orola nga hatagan sang closure order ukon padlakan ang mga pwesto nga indi sa gihapon makabayad sang ila utang bisan pa nga tuman ka minimal sang bulanan nga arkila./dyHB BACOLOD
