*General Santos City— *padayon pang ginaila sa operatiba sa Police Station 6 ang suspek nga responsabli sa dunggab patay sa biktimang si Glen Mark Quezon, legal age, mananagat ug residenti sa Zone 1, Barangay Bula Gensan kansa una nang gidunggab sa wala pa mailhing suspetsado kabuntagon kagahapong adlawa.
Sa karon ginasuta pa sa otoridad ang posibilidad nga natripan ang biktima sa wala pa mailhing suspetsado samtang kini pauli na sa ilang panimalay gikan nagtagay sa ilang lugar.
Una nang mihangyo ang pamilya sa biktima ngadto sa kapulisan nga palawman ang imbistigasyon sa kaso sa biktima aron nga mailhan ang suspek sa pagpatay.
Kahinumduman nga una nang nakaplagan sa nagpakabanang residenti sa lugar ang biktima nga nagbuy-od na daplin sa dalan nga dunay dakong samad dinunggaban sa iyang lawas. Nadala pa sa ospital ang nasangpit apan gideklara na kining dead on arrival.
