Nag-uban dili pa lamang dugay ang mga sundalo sa gobyerno ug mga kanhi combatant sa Moro Islamic Liberation Front – Bangsamoro Islamic Armed Forces, aron magpahigayon og peace mission, sa Barangay Padas, lungsod sa Pagayawan, Lanao del Sur.
Kauban ang Reserve Forces sa Philippine Army ug mga civilian volunteers, dala sa grupo ang nagkalain-laing tabang ug interventions alang sa mga residente nga apektado sa nahitabong kagubot tungod sa padayun nga recruitment sa Dawlah Islamiya ug operasyon ug militar batok sa grupo.
Mga tulo ka kilometro ang gilay-on gikan sa nasangpit nga lugar napatay sa puwersa sa gobyerno si Owayda Benito Marohomsar, alyas Abu Dar, kinsa maoy mihulip kang Isnilon Hapilon nga napatay sa giyera sa Marawi.
Isip tabang sa Armadong Kusog sa Nasud ug mga civilian volunteers, nagpabuhat kini og playground set alang sa mga bata ug nanghatag og gamit sa eskwela o mga school supplies, nagdala og seedlings ug tractor alang sa padayun nga pag-uma sa mga residente, ug nagpahigayon og medical mission ug psychosocial intervention.
Matud pa ni BGen. Romeo Brawner, Jr., commander sa 103rd Infantry Brigade, ang peace mission usa sa deradicalization program sa gobyerno aron malikayan ang recruitment sa ISIS sa mga residente sa Lanao del Sur.
Sa Barangay Padas, lima ang nakuhang recruit sa grupo nga mitahan na ngadto sa militar.
Katorse anyos ang pinakabata kanila. Kasama niini ang iyang amahan nga nahimong recruit sa grupo.
