Malaybalay City, Bukidnon – Gikasubo sa usa ka peace advocate ang pag-terminate sa gobyerno sa hisgutanang pangkalinaw tali sa CPP-NPA-NDFP.
Una niini, pormal na nga gikanselar sa gobyerno sa Pilipinas ang tanang mga negosasyon alang sa kalinaw uban sa maong grupo agig pagtuman sa ‘marching order’ ni Pangulong Rodrigo Duterte nga tapuson na ang peacetalks.
Gumikan sa mga bag-ong pagpangatake nga gihimo sa rebeldeng komunista sa tibook nasud, napugos matud pa si Pangulong Duterte nga magdesisyon nga humanon na ang peace talks sa ilaha.
Sa interview sa RMN Mlaybalay ngadto kang IFI Bishop Felixberto Calang, Mindanao peace advocate gibutyag niini nga nasubo siya sa pagkansela sa hisgutanang pangkalinaw tali sa GPH-CPP-NPA-NDF.
Sigun ni Calang nga pinaagi unta sa hisgutanang pangkalinaw, masulbad ang ugat hinungdan sa armadong pakigbisog.
Usa daw kini ka makasusubong development sa paningkamot alang sa kalinaw ilabina ug layo na ang na-abtan sa mga negosasyon.
