General Santos City—Nagpadayon pa ang imbestigasyon sa Tboli PNP kalabutan sa kamatayon sa usa ka minero nga si Bimbo Maguan Mindal, 35 anyos ug residente sa Purok Lugan III, Barangay Poblacion, Tboli, South Cotabato kansa gipusil patay sa wala mailhing mga suspek samtang duna kini ginatrabaho sulod sa girentahang ball Mill sa lugar.
Pamahayag ni Police Major Herzon Parangan labaw sa T’boli MPS nga dili pa nila matumbok ang motibo sa krimen kung asa karon padayon pa silang nagapangalap ug impormasyon sa posibleng makatabang sa pagresolba sa kaso.
Sumala pa sa opisyal nga duha ka mga lalaki ang miduol sa biktima niadtong higayona nga nakasul-ob ug facemask ug diretso pusil sa nasangpit samtang ang driver ang nahimo matud pang look out.
Human sa krimen, paspas nga misibat sakay sa motorsiklo nga walay plaka numero ang mga suspek.
Saysay pa niini nga naka-angkon ug igo pinusilan ang biktima sa ubos nga bahin sa iyang dughan ug nadala pa sa ospital apan gideklarang dead on arrival sa attending physician.
Gipaklaro usab niini nga dunay witness nga nakakita sa panghitabo apan wala niini nailhan ang mga suspek tungod kay nakasul-ob ug facemask kansa matud pa ang gunman ang anaa sa 5ft. ang gitas-on nga nakasul-ob ug itom nga jacket ug maong nga short. (RV)
