Gi-andam karon sa Regulatory and Complaint Board kon RCB sa City hall ang ilang rekomendasyon aron ilang pangayoon sa City Council sa sunod bulan ang usa ka ordinansa nga maoy magmando aron tahasan ang tag-iya sa mga Mini Movie Houses nga mag-install sila sa CCTV Camera sa ilang mga private rooms sa ilang mga establishments.
Mao kini ang gibutyag ni Antonio Resma nga team leader sa Inspectorate team sa RCB.
Matud ni Resma nga ilang gikinahanglan sa RCB nga dunay itaod nga CCTV Camera sa mga private rooms sa mga mini movie Houses aron malikayan ang paghimog malaw-ay nga bulohaton ang ilang mga customers samtang nagtan-aw og salida sulod sa mga private rooms sa maong mga establisamento.
Gibutyag ni Resma nga samtang wala pay ordinansa, ila lang una nga gihangyo ang mga operators sa Mini Movie Houses nga ilang taoran sa CCTV Camera ang private room sa ilang mga Movie Houses aron ilang makita ang gihimo sa ilang mga customers.
Gipasabot ni Resma nga ilang gihingosgan sa RCB, ang pagbantay sa mga mini movie houses ning syudad aron dili kini magamit sa sexual activities sa ilang mga kliyente.
