Epektibo karong Mayo 1, 2019 ang 320 pesos nga minimum wage sa mga mamumuo dinhi sa rehiyon sa Caraga.
Gikompirma ni Board Secretary Earl dela Victoria sa Regional Tripartite Wages and Productivity Board (RTWPB) sa interview sa RMN DXBC Butuan, nga nahukman sa wage board ang 15 pesos nga dugang Cost of Living Allowance (COLA) ngadto sa naandang 305 pesos nga daily minimum wage hinungdan nga karong tuiga miabot na kini sa 320 pesos ang minimum nga suhulan.
Sa sunod semana, pormal nga i-anunsyo ni DOLE Caraga Reg’l Director Chona Mantilla ang naasyong maayong balita alang sa mga mamumuo.
Aminado si Board Sec. dela Victoria nga daghan gihapon ang dili kontento ug nakulangan sa 320 pesos nga minimum wage apan mao kini ang win-win nga desisyon sa wage board nga gilangkoban sa labor sector, management sector, National Economic Development Authority (NEDA), Department of Trade and Industry (DTI) ug Department of Labor and Employment (DOLE). (VC. RTWPB 1)
