General Santos City—Gikustudiya karon sa Police Station 1 ang usa ka minor de edad human nadakpan atol sa gihimong entrapment operation human iyang gikawat ug gipalukat ang cellphone sa usa ka estudyante sa usa ka tunghaan sa Gensan.
Una nang midangop sa Police station 1 ang usa ka 17 anyos nga estudyante sa NDDU human matud pang gikawat ang iyang cellphone ug wallet sulod mismo sa ilang tunghaan.
Basi sa saysay niini alas 9:00 sa buntag dihang wala niya mabantayan nga gikawat na sa suspek ang iyang cellphone ug wallet. Ala 1:00 pasado ang takna sa hapon dihang may nagmessage sa Facebook sa biktima kung asa nagpaila matud pa kini nga siya maoy nakakuha sa cellphone sa nasampit.
Iyang gipalukat sa biktima ang cellphone niini nga usa ka Iphone x nga nagkantidad ug P87,000.00.
10 mil usab ang kwartang gipangayo sa suspetsado ngadto sa biktima bugti sa pagbalik niini sa iyang cellphone. Apan inay ideretso ug hatag sa biktima ang P10,000.00 ngadto sa suspetsado nakig-alayon kini ngadto sa kapulisan aron nga ipahigayon ang entrapment operation.
Didto sa Plaza Heneral Santos gihimo ang transaksyon nga miresulta sa pagkasikop sa nasampit nga suspek.
Sa karon ang suspetsado pabilin sa Police Station 1 ug wala pa masayod ang kapulisan kung ipadayon sa biktima ang pagpasang-at ug kaso batok sa suspek.
