General Santos City—Angol ang usa ka minor de edad human kining gidunggab sa wala mailhing suspetsado samtang kini natulog atubangan sa usa ka establishemento sa may Papaya Street, Gensan alas 2:20 ang takna sa kaadlawon.
Ang biktima itago lang sa pangalang Alias Angelo, 16, residenti sa Badjao Vill., Barangay Bawing, Gensan.
Sa record sa Blotter book sa Dr. Jorge Royeca Hospital nasuta nga natulog ang biktima uban sa iyang mga kaubanang badjao sa lugar, apan kalit lang matud pa kining giduol sa wala mailhing suspek dayon gidunggab tulo ka higayon.
Paspas nga misibat ang suspek samtang ang biktima gidala sa iyang mga kabanay sa Dr. Jorge Royeca Hospital.
Subay sa pahayag sa inahan sa biktima nga wala sila masayud sa hinungdan nganong gidunggab ang iyang anak. Wala man syay nasayran nga nakalaban ang iyang anak samtang sila nia sa sentrong bahin sa syudad.
Sa karon naghimo na ug makuting imbistigasyon ang Police Station 1 kalabutan sa maong insidenti.
