General Santos City—ospital ang gidangatan sa usa ka 17 anyos nga lalaki human nga naunay sa iyang jolen gun suldo mismo sa ilang panimalay sa may Barangay Napnapan, Palimbang, Sultan Sudarat.
Ang biktima nailhang si Agen Campao, 17, mag-uuma ug residenti sa samang lugar. Sa report nasuta nga alas 10:00 ang takna sa buntag niadtong nakalabayng adlaw dihang gidula-dulaan sa biktima ang iyang Jolen gun, aksidenti niining nakablit ang gatilyo nga maoy miigo sa iyang liog human nag ong-ong ang buka niini sa iyang liog.
Tungod layo ang panimalay sa biktima ngadto sa ospital, igo ra nila kining gitambal-tambalan sa ilang balay hinungdan nga nigrabe ang kahimtang sa nahisgutan.
Alas 7:00 sa gabie niadtong Martes, July 25, 2017 lang nadala ang biktima sa Dr. Jorge Roreca Hospital dinhi sa dakbayan sa Gensan human midesisyon ang pamilya niini nga ipaadmitar ang nahisgutang minor de edad.
Sa kasamtangan luwas na kini sa kuyaw nga kahimtang ug kasamtangan nalang nga nagpaalim sa iyang samad sa iyang liog.
