Nalipay si Sir Vincent Jun Dy, ang Provincial Disaster Risk Reduction Management Department head nga walay namatay o naangol atol sa paghapak ni Bagyong Basyang sa Misamis Oriental.
Mapasalamaton usab si Jun Dy sa mga Municipal Disaster team officer sa nagkalain laing lungsod, gumikan sa ilang walay hunong nga pagpahibalo, pagpahimangno ug pagmonitor sa ilang palibot niadtong miaging adlaw.
Gawas niini, nagpasalamat usab ang maong opisyal ngadto sa tanang local executive officers, mga rescuers, operators ug uban pang kanunay nakamonitor atol sa pagsulod ni bagyong Basyang.
Nagpaabot usab si Sir Jun Dy sa iyang pagpasalamat kang Gobernor Bambi Emano, kinsa gilayong mideklarar sa pagsuspenso sa klase sa tanang lebel sa Misamis Oriental, human niini nasayran nga miabot sa signal number 2 niadtong higayona ang lalawigan.
Samtang…..
Gipaabot usab niini ang iyang pagpasalamat ngadto sa pipila ka department head, nga anaa sa command center kinsa kauban nilang nagtukaw pagmonitor sa kahimtang sa panahon.
Mahinumdoman, nga lakip sa apektado sa pagbaha niadtong mihapak si bagyong Basyang ang mga lungsod sa Talisayan, Sugbongcogon, Binuangan, Salay, Lagonglong, Gingoog City, Alubijid, El Salvador City ug Manticao.
Hinuon, padayon pa gihapon nilang gisusi kung pila ang nahimong damyos sa infrastruktura atol sa paghapak ni bagyong Basyang.
Dugang pa niini, nga bisan sa gibating kalipay gumikan kay walay mga kaswalti niadtong higayona, apan nasubo gihapon kini tungod kay adunay pipila ka residente sa Mis. Or. ang ulahi nang mipatuman sa force evacuation bisan nga sayo pa sila mihimo sa preemptive evacuation.
