Davao City – Posibleng nanagat lamang ang sakay sa unom ka bangka nga midunggo pasado alas 8:00 sa gabii sa Purok 23, Isla Suerte, Times Beach, Barangay 76-A, Davao City.
Sa interbyu sa DXDC RMN Davao sa mga Brgy officials, nasuta nga posibleng mananagat ang nakit-an sa maong baybay subay sa ilang pag-inbestiga sa pagpanguna ni Kapitan Rolando Trajera diin tingdagsa sa mga gagmay isda ug nukos sa maong panahon.
Una nang gika-alarma sa mga lumolupyo sa maong lugar ang pagbutho sa mga bangka diin sa interbyu sa RMN Davao kang Warlito Babaya, usa sa nakakita nga lima ka mga tawo ang nagsakay sa maong bangka nga dunay handset radio nga dala sa wala mailhing tawo diin usa ang minaug apan dali ra sab nibalik ug sakay.
“Naa man ko sa distansya gud. Ang ako lang nakita pagpasiga nila sa suga, ninaug ang usa nga puti og sinina. Unya pagka taud-taud, nibalik og saka sa sakayan,” saysay ni Babaya.
Gibanabanaan nga usa ka oras nga nagpundo sa baybay ang nahisgutan apan pagka alas 9:00 sa gabii dali silang mibiya sa wa masayring destinasyon.
Sumala sa mga residente, ikatulong higayon na kini nga dunay unidentified nga mga bangka nga midunggo sa nasangpit nga lugar.
RadyoMaN Don Pulayao
