General Santos City–Gikabutyag ni Police Lieutenant Felix Minion ang deputy station commander sa Lagao PNP nga karong adlawa gikatakdang pasakaan ug kasong pagpangawat ingon man sa kalapasan sa sec,11 sa RA 9165 ang suspek nga si Rogen Rivas kansa nasikop nga maoy mikawat sa importanteng gamit, kwarta ingon man armas sa usa ka sundalo nga si Sgt. Arnulfo Ramos Jr. nga nakabase sa 2nd Dental Operating Team nga naa nahimutang sa likod sa Dr.Jorge Royeca Hospital.
Sumala pa sa opisyal nga gisulod sa suspek ang bunkhouse sa sundalo nga gama lamang sa light materials ug namatikdan sa sundalo nga misulod sa lugar ang suspek ug sa dihang paglantaw niini wagtang na ang iyang mga gamit, kwarta ingon man ang isyu niining armas.
Saysay usab ni minion nga malampuson nilang nasikop ang suspek sa gipahigayong follow operation sa kapulisan human nga gi-review ang cctv sa lugar.
Dugang saysay ni Police Leutenant Felix Minion nga atol sa pagkasikop sa suspek dihang girekisa niini ang lawas sa mga operative team nakuha sa tuong bulsa sa suspek ang pitaka sa sundalo dunay sulod nga mga i.d ug ATM apan pakyas niining nahibalik ang kwarta ug armas nga gikawat sa suspek.
Pagpaklaro man usab ni Minion nga nakuhaan usab ang suspek sa walang bahin sa iyang bulsa ug usa ka sachet nga gituohang shabu nga kasamtangan giturn-over na sa PNP Crime Laboratory Office 12 alang sa quantitive ug qualitative examination.
Sa kasamtangan pabiling balhog sa selda sa Police Station 3 ang suspetsado.
