Dead-on-arrival sa balay-tambalanan ang drayber ug pahinante sa usa ka mixer truck sa dihang nahulog kini sa bakilid nga bahin sa Sayre Highway, Zone 1, Brgy. Maluko, Manolo Fortich, Bukidnon kagahapong adlawa.
Gikatahong gikan sa Brgy. Nasalaban, Tagoloan, Misamis Oriental ang maong mixer truck padulong sa Biogreen, Kisolon, Sumilao, Bukidnon karga ang ready-mix nga mga konkreto sa dihang nahulog sa bakilid gumikan sa kahigyas sa dalan resulta sa kusog nga ulan.
Giila ang mga biktima nga sila Arnold Ido, 40 anyos, minyu, drayber sa maong mixer truck ug mulopyo sa Mat-i, Claveria, Misamis Oriental ug ang sakay niini nga si Donald Pialan, 30 anyos ulitawo ug mulopyo sa Sumalsag, Malitbog, Bukidnon ang pulos nakabsan sa kinabuhi sa naasoy nga aksidente.
Gipanghimangnuan usab ni Pcol Jun Mark J. Lagare, Bukidnon Provincial Police Office Director ang mga kapulisan sa Manolo Fortich sa striktong pag-implementar sa balaod trapiko alang sa kaluwasan sa mga motorista.
