BAGO CITY – Nagpatigayon sang demonstration ang Office of the Provincial Agriculture sang panibag-o nga mga kagamitan sa panguma kaangay sang rice harvester nga makaani sang kapin 5 ka ektarya sa isa kaadlaw.
Gindemonstrate man ang levee maker ukon ang nagaobra sang kahon sang talamnan lakip man ang rice transplanter nga amo ang nagatanom sang gingabot nga humay sa diin makatanom ini sang 2 ka ektarya sa tagsa kaadlaw.
Ang demonstrasyon ang gin pangunahan ni Provincial Agriculturist Atty. Japhet Masculino nga gin tambungan naman ni Mayor Nicholas Yulo sang Bago City mga katapo sang kooperatiba sa nagkalain lain nga bahin sang probinsya sang Negros Occidental kag mismo ni Governor Alfredo Marañon Jr.
Ang mga equipment ang nagalab-ot sang kapin P2.5 milyones pesos.
Ginpahayag ni Gov. Marañon nga paagi sa sini nga mga kagamitan mabuligan ang mga mangunguma nga mapamenos ang ila kagastuhanan kag inde na kinahanglan ang madamo nga mga trabahador agud nga magtanum kag mag-ani sang humay.
Ini bangod nga ang karon nga henerasyon, nga ang halos mga kabataan sang mangunguma ang nagatrabaho na sa syudad.
Ang mga kagamitan ang igapanghatag sa mga kooperatiba kag ini na sila ang magapadalagan agud maserbisyuhan ang mga mangunguma nga nagatanum sang humay.
Dugang pa sang gobernador nga ang talatapan sang agrikultura sa probinsya ang nakahanda nga magbulig sa mga mangunguma agud nga makatibawas ini sa ila naeksperiensyahan nga kapigaduhon. / Grace Supe photo
