Gin-extend pa tubtob sa Hunyo 30 ang implementasyon kag guidelines sang Modified General Community Quarantine sa probinsya sang South Cotabato base sa Executive Order no. 33 ni Governor Reynaldo Tamayo Jr.
Sa nasambit nga EO nagapabilin sa gihapon nga sarado ang border areas sang South Cotabato, apang ginapakakas na sini sa mga alkalde ang mga boarder control sa mga banwa kag syudad.
Bawal sa gihapon ang 21-anyos panubo kag ang mga senior citizen kag subong man ang angkas.
Suno kay Governor Tamayo ang rason sa pag-extend niya sang MGCQ tubtob sa Hunyo 30 tungod padayon ang pag-abot sang mga returning OFW`s kag mga locally stranded individuals ukon LSI`s sa probinsya, matapos nga may pipila sa mga ini ang nagpositibo sa COVID-19 amo nga kon buksan ang border areas sang probinsya mangin mabudlay ang monitoring sa mga LSI kag ROF.
Apang suno sa gobernador posible indi magdugay pa sa Hunyo 30 ang MGCQ sa South Cotabato sa tion nga indi paboran sang National Inter-Agency Task Force ang hingyo sang Regional IATF nga pagpalawig sang border control kag posible ang regional border control na lang ang mapatuman.
Sa subong suno kay Governor Tamayo nagbalik na ang 90 porsyento sang economic activities sa South Cotabato.
Panawagan naman sang gobernador sa mga ROF kag LSI ilabi na ang mga halin sa iban nga probinsya nga may local transmission sa COVID-19 nga makig-angot sa mga health officials sa lugar kag sundon ang 14 days quarantine.
Samtang duha naman ang narekord nga panibag-o nga nagpositibo sa COVID-19 sa South Cotabato kahapon nga adlaw nga isa ang locally stranded individual nga halin sa Metro Manila kag nag-abot dire sa probinsya sang Hunyo 11 kag isa ka seaman nga halin man sa Metro Manila kag nag-abot sang Hunyo 13, lunsay naman ang mga ini residente sang Tupi.
