Magaresume sa masunod nga bulan ang mobile chest X-ray sang Integrated Provincial Health Office bilang kabahin sang pagpabakod sa kampanya kontra balatian nga Tuberculosis ukon TB matapos nga nauntat sang bulan sang Marso.
May-angot sini, suno kay Provincial Infectious Disease Coordinator John Codilla magalibot naman sila sa mga kabanwahanan dire sa probinsya para sa paghatag sang libre nga chest X-ray sa mga pumuluyo.
Kabahin man sang programa sa TB suno kay Codilla ang pagpabakod sang contact tracing sa mga contacts sang TB patients agud nga maprebentar ang paglapta sang TB infection.
Nahibaluan nga isa man ini sa infectious disease nga balantayan tungod padayon ang pagsaka sang kaso sang TB dire sa probinsya kag isa man ini sa makalalaton nga balatian.
Ginkumpirmar man ni Codilla nga ang may balatian nga TB ang mas madali nga maigo sang COVID-19 tungod mahina ang ila nga resistensya amo nga iya ginaadvice sa mga pasyenti nga maglikaw sa matawo nga lugar kag istrikto gid nga ipatuman ang physical distancing.
photo by : IPHO South Cotabato
