Ivisan, Capiz- Arestado ang isa ka persona nga nagabaligya sang mga peke nga sigarilyo sa Poblacion Sur banwa sang Ivisan kahapon alas 5:30 sang hapon.
Ginkilala ang suspek kay Joselito Artuz y Malic, 23-anyos sang Veterans Village Fort San Pedro Iloilo kun sa diin natigayon nga marekober sa iya ang kabug-osan nga 17 tanan ka mga pakete sang tatlo ka sahe sang sigarilyo.
Sa interview kay SPO4 Gilbert Quiachon sang Ivisan PNP, base sa pahayag sang store owner nga si Judily Isiderio nagluntad ang komosyon sa tunga sang mga ini sang ginpamilit sang suspek nga ini ang bayaran sang kantidad nga presyo sang sigarilyo nga iya ginbakal apang ginpanindugan ni Isiderio nga ini ang magabayad lamang kun makumpleto sang suspek ang kulang nga isa ka pakete.
Ginpangayoan niya ini sang resibo apang namalibad nga maghatag ang suspek kabangdanan nga diri na nagsuspetsa ang biktima.
Naakig ang suspek kag siya pa ang gintikwang antes nga nagpalagyo apang bangod sa bulig sang mga pomuluyo, natigayon nga madakpan si Artuz.
Sa subong yara na kustodiya sang Ivisan PNP ang suspek samtang padayon ang imbestigasyon sang kapulisan kun sa diin ini nagkuha sang mga items. Ini naman ang natalana nga pasakaan sang kaso nga paglapas sa section 155 sang Intellectual Property Code of the Philippines.
