Tapaz, Capiz – Tatlo ka mga indibidwal ang nagdangup sa mga otoridad sa banwa sang tapaz matapos nga ang mga ini ang ginapahayag nabiktima sang modus pinaagi sa paggamit sang pangalan ni Mayor Roberto Nonong Palomar.
Ginkilala ang mga biktima nga sanday Reyna Marie Mendoza y Mejica, 29-anyos nga isa ka ticketing sales agent; Maria CH Gloria y Estorque, 31-anyos isa ka negosyante kag Raymond Ballentes y Molina, 31-anyos nga isa ka branch manager sang isa ka remittance center sa banwa sang Tapaz.
Suno sa mga biktima, may nagtawag sa ila paagi sa ila cellphone kag nagpakilala nga ini amo si Mayor Nonong Palomar kag nagsiling sa ila nga kun mahimo ila loadan ang cellphone sang mayor subong man ang cellphone numbers sang mga kaupdanan sang alkalde.
Dugang pa sang mga ini nga naghambal pa ang caller nga kuhaon lamang ang bayad sa opisina ni Mayor Nonong Palomar. Bangud sa pagpati nga alkalde gid man ang nagapanawag sa mga biktima, gin-loadan sang mga ini ang cellphone numbers nga ginhatag sang suspek.
Sa pagpakig-angut kay Information Officer Margie Gimeno sang Tapaz, ginpahayag sini nga ginabanta masobra sa P40, 000 pesos ang kantidad sang cellphone load nga natigayon nga makuha sang wala makilala nga mga suspek.
Sa subong, gin-alerto na sang mga otoridad ang publiko nga mag-andam angut sa nasambit nga modus. Hugot man nga ginpanindugan sang alkalde nga indi makigtransaksyon sa kay bisan sin-o man nga maggamit sang iya ngalan.
*Photo Credits: Tapaz Municipal Information Officer Margie Gemino, Google Maps*
