Halos 90 porsiento na nga kumpleto kag pwede na maka-operate ang Valladolid Molecular Laboratory.
Suno kay Provincial Administrator Atty. Rayfrando Diaz nga natapos na ang building kag yara naman ang machine laboratory sa diin trained na ang tanan nga personnel para sa operation sini.
Apang, suno kay Diaz, wala pa ang license to operate halin sa IATF-DOH nga dapat ma-issue agud maka-operate ang private company nga magapadalagan sang amo nga laboratory.
Pahayag pa ni Diaz nga posible sa ikaduha na nga semana sang Enero 2021 magasugod ang pagbaton sang swab specimen sang mga pasyente.
Nahibaluan nga ang Valladolid Molecular Laboratory, isa ka joint venture sa tunga sang provincial government sang Negros Occidental kag pribado nga kompaniya nga amo ang Safeguard Laboratory Company (Manila based) nga maga-operate base sa terms and conditions.
Ang building kag area iga-provide sang probinsya kag ini pagabayaran sang 95,000 pesos kada bulan, samtang sa bahin sang operasyon sa pagbaton pasyente nga nagapa-swab test, ang bayad ang iga-charge naman sa PhilHealth.
Ini na ang ikaduha nga COVID molecular laboratory sa probinsya sa diin una nga gintukod ang yara sa Teresita Lopez Jalandoni Provincial Hospital sa Silay City.
[image: image.png]
