General Santos City—nagpadayon ang gihimong imbistigasyon karon sa Police Station 7 kabahin na sa pagpamusil sa wala mailhing suspect ngadto sa biktima nga si Christopher Hermosa, 37 anyos, nga residenti sa PRK. Santo Niño, Barangay San Jose ning syudad niadtong nakalabayng Byernes.
Nasayran nga kasamtangang giatiman sa samtang biktima ang iyang alagang manok sulod sa iyahang panimalay dihang kalit lang kining gisulod sa suspek dayon gipusil igo sa tyan nga bahin, maayo nalang nga nakadagan ang biktima ug nakapangayog tabang mao nga wala sya mapuruhan sa suspek.
Sumala pa ni Police Senior Inspector Fernando Manuel, nga daku ang posibilidad nga kaila lang sa biktima ang mipusil kaniya hinungdan nga hulaton nila nga mahimong stable ang kahimtang niini sa balay tambalanan aron usab nga makuhaan nila ug testimonya.
Gipasalig man usab sa nasangpit nga opisyal nga dali nilang masulbad ang maong pag pamusil gumikan posibling makakuha matud pa sila ug impormasyon gikan mismo sa biktima bahin sa posibling nakalaban niini. (Dave Silagan)
