LA CASTELLANA – Duha ka mga motorsiklo ang nagbungguanay sa Purok 3, Barangay Cabagna-an banwa sang La Castellana kaina sang aga.
Ginpahayag ni PO1 Cesar Rosales Jr., imbestigador sang Traffic Division sang La Castellana PNP, nga ang duha ka mga motor amo ang Kawasaki Bajah nga ginamaneho ni Rex Abiner Salmorin, 47 anyos sang Purok 1, Barangay Cabagnaan, nga nakaagum sang pilas sa ulo kag iban nga bahin sang lawas.
Samtang nasamaran naman ang iya live-in partner nga nagaangkas kay Salmorin nga ginkilala kay Miriam Homboy.
Ang driver naman sang Honda XRM nagaduag sang itom kag puti ginkilala kay Mark Mecero Homboy nga nakaagum man sang pilas sa ulo kag iban nga bahin sang iya nga lawas.
Sa imbistigasyon sang dyHB, ang Bajah ang nagikan sa La Castellana proper kag papauli na sa Cabagna-an apang paglab-ot sini sa Purok 3, sa kurbada nga dalan nag -overtake ini sa ginasundan nya nga tricycle kag tungod kurbada wala nya nakita nga may sugata sya nga Honda XRM kag dire na sila nagbungguanay.
Gilayon nga gindala naman sa ospital sa syudad sang Bacolod ang duha ka mga driver apang nabilin naman sa La Castellana si Miriam bangud indi naman malubha ang iya naagum nga mga pilas sa lawas. /Contributed photo
