General Santos City—Anaa na sa kostudiya karon sa Pendatun Police Station General Santos ang motorsiklong biktima sa carnapping kaniadtong milabayng December 9 sa kaadlawon sa may area of responsibility sa Pendatun PNP Gensan.
Kahibaluan nga nabawi sa mga operatiba sa Glan Police Station ang Honda XLR kolor pula nga matud pa ginabaligya sa mga suspek nga giilang silang Teddy Utadora, 21 anyos, og Nelboy Awon nga taga Laguimit Glan Sarangani Province.
Apan padayon nga ginakwestiyon karon sa mga kabanay sa napatayng si Teddy Utadora ang pagpusil patay sa suspek sulod sa ilahang presento sa kapulisan sa Glan samtang ginaimbestigahan ang mga suspek.
Kahibaluan nga gihingusgan sa Glan PNP nga napugos na lamang og pagpusil si Police Chief Inspector Manuel Ryan Lim ngadto sa suspek human kining nangilog og pusil ni P02 Herbert Alinsugay samtang anaa sila sulod sa investigation section sa Glan PNP.
Matud pa sa mga kabanay sa napatay nga imposibling nangilog og armas ang suspek nga anaa naman sa ilahang kostudiya.
Sa pagkakaron misaad si Police Chief Inspector Niel Wadingan ang tigpamaba sa Sarangani PNP Command og patas nga imbestigasyon ngadto sa mga kabanay sa napatay.(Emir Bariquit)
