ILOG, NEGROS OCCIDENTAL – Isa ang patay duha nasamaran sa natabo nga pagbungguanay sang isa ka motorsiklo kag traysikol sadtong Sabado sang gab-I sa Brgy. Tabu, banwa sang Ilog.
Nakilala ang biktima nga napatay nga amo si Roy Alcabete, 34 anyos ang edad, driver sang motorsiklo samtang nasamaran naman ang nagaangkas sa iya nga si Roger Cabanao, 26 anyos lunsay pumulyo sang Brgy. Tabu.
Lakip pa sa nasamaran amo si Adre Vaflor, 29 anyos ang edad, pumuluyo sang Brgy. Tooy, Himamaylan kag amo ang driver sang isa pa gid ka traysikol.
Suno sa imbestigasyon, mga las 11:30 sadtong Sabado sang gab-i natabo ang insidente sa Purok Sangrila, Brgy. Tabu kon diin nakainom kag madasig ang padalagan sang motorsiklo sang mga biktima hain sa Bucana, Ilog.
Sa pag-abot sa Brgy. Tabu, nasugata sang motor ang traysikol nga buot na kuntani magpauli halin sa Candoni kag didto sila nagbunggu-anay.
Bangud sang mabaskug nga impact, lunsay nag-angkon sang head injuries ang mga biktima nga nagresulta naman sang gilayon nga kamatayon ni Alcabete.
Samtang, ang driver naman sang traysikol nag-angkon lamang sang slight injuries kag detained karon sa custodial facility sang Ilog Municipal Police Station./dyHB BACOLOD
