Dipolog City – Kritikal karon ang kahimtang sulod sa probinsiyal hospital ang usa ka motorcab driver human dunggaba ug screwdriver sa kainom niini didto sa Purok De Lapaz, Barangay Sicayab, ning dakbayan sa Dipolog, nahitabo pasado alas 9:00 niadtong sabado sa gabii.
Ang biktima giila sa kapolisan nga mao si Rodenio Gumate Jr., 37 anyos, minyo, samtang ang suspetsado mao usab ang kaliwat niini nga si Gerodes Grafaldia, 28 anyos, ulitawo kansa trabaho laborer sa glass center og managsilingan ang duruha sa maong dapit.
Base imbestigasyon sa Homicide Section sa Dipolog PNP, nasayran nga nakig-inom ang biktima sa suspetsado uban sa duha ka amigo sa usa ka tindahan nga nahimutang dili layo sa ilang mga balay.
Nagsugod sila og inom human sa ilang trabaho ug nagpadayon sa lawom nga kagabhion.
Gumikan anaa sa gahum sa bino, ang duruha nagkalandrakas nga mga estorya ug nautingkay ang karaan bikil nga nisangpot sa hinudlatay.
Ang suspetsado nga wala kaagwanta gihulbot ang dalang star screw diha sa bag giduslak kadaghang higayon ang biktima.
Nakahiagom ug unum ka samad linobaan ang lawas sa biktima diin duha sa tiyan, tulo sa buko-buko ug usa sa tangugo kinsa nakadagan pag-uli sa ilang balay diin ang asawa na niini maoy nagdala sa Zamboanga Del Norte Medical Center, kinsa ana-a karon sa kritikal nga kahimtang gumikan wa makagawas ang dugo.
Ang suspetsado daling nisibat sa ilang barangay human sa krimen apan kagahapon bandang alas 8:25 sa buntag malampuson ra kining nadakpan sa hot pursuit ug follow-up operation sa kapolisan sa Dipolog ug karon mikagulkol na sa prisohan.
