Nagmalinawon ang gipahigayong motorkada kagabii sa Itum nga Nazareno libot sa pipila ka piniling kadalanan sa dakbayan.
Tungod niini, mapasalamaton si Police Lt. Col. Lemuel Gunda, ang Deputy for Operation sa Cag. De Oro City Police Office o COCPO sa katawhan ning syudad.
Kini tungod kay anaa lamang sa gawas sa ilang mga balay naghulat ang katawhan sa syudad, atol sa pag-agi sa motorkada sa Itum nga Nazareno.
Dugang pa ni Col. Gunda, nga nakita nilang nagkaway kaway na lamang sa ilang mga panyo ang mga deboto, nagdagkot og kandila ug nagdala sa ilang mga gagmayng replica sa Itum nga Nazareno gawas sa ilang mga pinuy-anan.
Kini gumikan na usab kay wala may gitugotan mouban sa motorkada sa Itum nga Nazareno ug wala usab gitugot ang pagpahid sa mga panyo, paghikap ug paghalok aron nga makalikay sa makatakod ug makapatay nga Covid-19.
