Pagadian City – Hustisya nga singit karon sa pamilya sa mga biktima sa hit and run nga nahitabo alas 7:30 sa gabii niadtong huwebes dihang dapita sa National Highway, Brgy. Balintawak ning syudad sa Pagadian.
Patay ang driver ug usa ka backrider niini dihang napungitan sa pick-up color itom ang gisakyan nila nga Honda XRM 125.
Dead on arrival sa ospital ang backrider nga si Bryan Dela Peña, residente sa Tagolo, Lanao Del Norte samtang nakabsan usab pila ka oras ang nilabay didto sa ospital ang driver sa motor nga si Aljun Mong Andales lumulupyo sa San Francisco, Pagadian City.
Gapaalim sa ospital ang laing sakay sa single motor nga si Roel Villetes Salvador, taga-Cuatro cuatro, Dumalinao, Zamboanga Del Sur nga nakahiagom sa bun-og sa lawas.
Sa inisyal nga imbestigasyon nasayran nga samtang nagdagan ang motorsiklo nga gisakyan sa mga biktima paingon sa lungsod sa Dumalinao gika-engkwentro niini ang pick-up color itom nga miresulta sa panagbanga partikyular sa North Diversion road Balintawak, Pagadian City.
Human sa hitabo ang pick-up nga nakabanga daling nisibat og gibyaan ang mga biktimang nanga ligid sa kalsada.
Gipangita na sa kapulisan ang mga sakyanan aron kini makapanubag sa salaod nga iyang nahimo.
Walay kabutangan sa kasuko sa pamilya sa namatay nga biktima ilabina nga may tulo ka mga anak ang namatay nga driver nga si Andales.
Naghandom nalang ang pamilya nga makosensya ang nakabanga sa motorsiklo.
