General Santos City—patay ang usa ka 16 anyos nga lalaki samtang angol usab ang kaubanan niini human nabangga sa poste sa kuryente ang gisakyan nilang motorsiko sa area atubangan sa Quantum, Barangay San Isidro ning syudad.
Giila ang namatay nga si John Ray Engkong, 16, residenti sa Hedelgo Compound, Barangay San Isidro Gensan. Samtang ang angol giilang si Rhino Gallenero, 29, residenti sa samang Barangay.
Sa inisyal nga imbistigasyon sa traffic management Unit, alas 5:30 ang takna sa buntag kagahapong adlawa dihang nabangga ang motorsiklong gimanihuan sa minor de edad nga si Engkong sa punuan sa poste nga miresulta sa paglagpot sa duruha.
Grabeng samad sa iyang agtang ang naangkon sa nahisgutan, samtang ang backrider niini nga si Gallenero kansa maoy nanag-iya sa motorsiklo ang nakaangkon usab ug mga samad sa lawas.
Base sa mga testigo, hubog ang mga biktima dihang nahitabo ang insidenti. Nadala pa sa Dr. Jorge Royeca Hospital ang mga biktima apan alas 2:00 ang takna sa hapon kagahapong adlawa, nakabsan ug kinabuhi si Engkong samtang gitambalan sa Dr. Jorge Royeca Hospital.
Sumala usab sa mga kabanay sa biktimang namatay nga ayha nahitabo ang pagbangga sa mga nahisgutan, natulog na unta sa ilang panimalay ang biktimang si Engkon apan siya gisugat ni Gallenero ug gidala sa imnanan.
Ang minor de edad pa maoy iyang gipamaniho sa iyang motorsiklo bisan nga kini nakainum. Sa karon nagpadayon pa ang imbistigasyon sa kapulisan kalabutan sa insidenti.
