Motorsiklo sumunggab sa gate, driver naka ICU, back rider ninahan

New Washington, Aklan – Padayon makaron nga gina obserbahan sa Intensive Care Unit (ICU) it Aklan Provincial Hospital rong sangka 18-anyos nga eaeaki matapos nga maaksidente kabii sa national highway it Brgy. Ochando, New Washington, Aklan.
Ro biktima nakilaea kay James Calvin Patricio nga nakaangkon it lastro sa ueo ag iba pang parte it eawas ag may backrider nga si John Ryan Flaviano, 18-anyos residente it Brgy. Mobo, Kalibo ag nakaangkon it mga gasgas sa eawas.
Base sa naka saksi sa aksidente nga si alyas “Jun” rayang mga biktima sakay it motorsiklo halin sa Brgy. Dumaguit nga direksyon paadto it Poblacion, New Washington apang pag-abot sa may kubarada nga porsyon it karsada sanda ra hay may gin obertikan nga saeakyan pero sa kadasig it daeagan hay nag deri-deritso sanda sa gate ko baeay it pamilya Barrios.
Sa kabaskog ko impact hay nahukas gid ro gate sa gina ungtan nga pader ag naghawod.
Madasig man raya nga gin respondehan it mga taga New Washington PNP ag MDRRMO New Washington ag dayon nga gindaea sa hospital ro mga biktima, samtang si Flaviano hay gin refer sa OPD matapos mabueong.
Nasayuran nga naka inum ro mga biktima tag maaksidente.

Facebook Comments