Naluwas sa mga opisyal sa brgy. Nongnong ning syudad sa Butuan nga gipanguluhan ni brgy. Kapitan Wilfredo Membrillos, ang nasalaag nga “mountaineer” nga misaka sa Mt. Mayapay.
Nakadawat ug tahu ang mga opisyal sa barangay bandang alas 6 sa sayung gabie nga adunay usa ka mountaineer ang nawala sa bukid sa Mayapay.
Alas 12:04 sa tungang gabie nakadawat ug tawag ang Operation Center sa City Disaster Risk Reduction Management Office (CDRRMO) sa City Hall aron ipahibalo ang malampusong pagluwas sa nasangpit nga “mountaineer” nga giila lang sa pangalan nga si Carlo Caseres, 26 anyos ug gikan pa sa Taguig city, Metro Manila.
Si Carlo ang nabiyaan sa iyang mga kauban ug tungod kay dili niini kabisado ang kalasangan hinungdan sa iyang pagkasalaag.
Atol sa pagluwas nakita nga samdan ug naluya ang biktima mao’ng dali kining gidala sa Hospital aron patambalan.
Gikatahung walay koordinasyon ang mountaineer sa LGU Butuan sa ilang pagsaka sa Mt. Mayapay.
Daku ang pasalamat sa mountaineer nga si Carlo Caseres ngadto sa mga opisyal sa barangay Nongnong ug sa CDRRMO nga nagluwas kaniya gikan sa pagkasalaag sa Mt. Mayapay.
Sigun ni Carlo nga nag-inusara siya’ng misaka sa Mt. Mayapay tungod kay nahimung kalingawan sa iyang kaugalingon ang pagsuroy-suroy sa ubang parti sa nasud ug pagsaka sa mga habug nga bukid.
Niya pa nga nawala siya sa dalan pana-ug sa bukid, mao’ng gi-text niya ang iyang hinigugma didto sa kauluhan aron ipahibalo ang iyang sitwasyon.
Dali usab nga nakutay ang komunikasyon sa CDRRMO ug sa mga opisyal sa barangay mao’ng dali silang naglusad ug rescue operation nga nahimung malampuson.
Aminado si Carlo nga wala niya nasayran ang kadelikado sa seguridad sa lugar luyu nga karon pa ang unang higayun niya’ng pagtunob dinhi sa syudad sa Butuan.
