Davao City – Sa tabang sa lokal nga panggamhanan pinaagi sa Vice Regulation Unit (VRU), mamahimo nang makalimtan sa usa ka nicotine dependent nga indibidwal ang pagpanigarilyo.
Malipayong gianunsyo ni VRU head Dr. Ashley Lopez sa iSpeak Forum nga usa ang syudad sa Davao sa pinakaunang naka avail ug muhanyag og Nicotine Replacement Therapy pinaagi sa medicinal candies nga libre lamang.
Gitataw ni Lopez nga dili basta-basta makatumar ani nga candy sanglit kasabay niini ang counseling gani molungtad sa duha ngadto sa dose ka semana ang therapy depende sa pagka nicotine dependent sa usa ka indibidwal.
Matud niini nga wala hingpit nawala ang mga manigarilyohay sanglit gatago lang kini sa mga suok rason nga daghan sa gihapon sila madakpan.
“The only concrete intervention para ma-address natin ang nicotine dependency is to avail the nicotine replacement therapy,” segun niini.
Dugang ni Lopez nga sa bulan Setyembre lamang miabot ang kapin 350 ka mga box sa nicotine candies nga nakaschedule muabot matag quarter sanglit gigahinan kini ni Davao City Mayor Sara Duterte-Carpio og P500,000 nga pondo.
Duna nay walo ka mga dependents ang boluntaryong midangop kanila aron mangayo og medical interventions.
“[For those who are willing] You only have to introduce yourself to the office and fill-up some forms para maka avail mo ani,” batbat ni Lopez.
Base sa datos sa VRH, dunay kapin 9,300 ka mga Dabawenyo ang na-apprehend tungod sa parehong pataka og panigarilyo ug pag inum sa pampublikong lugar alang sa bulan sa Enero hangtod Setyembre, mas taas sa na-apprehend sa milabay’ng tuig 2018 nga anaa lamang sa kapin 9,300.
Sa pagkakaron si Dr. Lopez pa lang ang napailawom sa training alang sa medical intervention sabay saad nga mga ulahing bulan karong tuig ubay-ubay na ang mapailawom sa training sabag awhag sa ang mga nicotine dependents nga mudireso nalang usa sa ilang opisina.
RadyoMaN Jason Amisola
