Duha na ka local government units (LGUs) sa Negros Occidental ang nag-declare sang dengue outbreak.
Nag-respond sa rekomendasyon sang Provincial Health Office (PHO), ang syudad sang Kabankalan kag banwa sang Murcia nga mag-deklara na sang dengue outbreak bangud sa padayon nga pag-saka sang kaso sang dengue sa ila nga lugar.
Sa record sang PHO ang Kabankalan City ang may pinaka-damo nga kaso sang dengue nga naglab-ot sa 596 (January 1 to July 20, 2019).
Nagpatawag sang emergency meeting nagligad nga semana si Kabankalan Mayor Pedro Zayco sa diin nagpa-gwa man ini sang memorandum para sa mga barangay officials angot sa implementasyon sang action plan particular ang pag-tutok sa “four o’ clock habit” ukon ang SEARCH and DESTROY sa mga gina-itlugan sang lamok.
Nagpa-gwa man sang pondo ang Kabankalan nga kapin sa 4 million pesos para sa pag-bakal sang mga medical supplies.
Samtang, ang banwa sang Murcia ang nag-sugod naman sang fogging operations nagligad nga semana sa Barangay Lopez.
