SAN CARLOS CITY, NEGROS OCCIDENTAL – Gintiro patay ang leader sang isa ka Muslim community sa ciudad sang San Carlos kahapon sang hapon.
Nakilala ang biktima nga si Abdul Halim Mangonwatar, 51 anyos ang edad, pumuluyo sang ciudad sang San Carlos kag ginakabig Level 3 highvalue target kag leader sang Mangunwatar Drug Group nga naga operate sa Northern Negros.
Suno sa San Carlos City Police Office ang insidente natabo may mga las 5:40 kahapon sang hapon sa sulod mismo sang balay sang biktima sa Brgy. 5, San Carlos City.
Kapin sa 10 ka mga empty shell ang na recover sa scene of the crime halin sa armas nga gin-gamit sa pagtiro kay Mangunwatar nga amo naman ang gintunaan sang iya kamatayon.
Nahibaluan nga nagapakaon gid sang iya mga hinuptan nga manok ang biktima sang ini ang gindulugan sang duha ka mga suspek nga nakasakay sa motor kag gintiro.
Sa amo nga insidente, nadalahig man ang bayaw sang biktima nga si Muksin Asis kon diin ini ang naigo man kag nasamaran kag padayon karon ginabulong sa ospital./dyHB BACOLOD
