General Santos City-Patay ang 9 anyos nga batang lalaki human nga nabanggaan ug motorsiklo sa dalan nga sakop sa Purok Udagre, Barangay Conel, Gensan alas 4:48 ang takna sa kapon, kagahapong adlawa.
Giila ang biktima nga si Eric John Mosquera, 9, residenti sa Carmen North Cotabato. Subay sa Blotter sa Traffic Management Unit (TMU) mitabok ang bata sa kalsada ug nabangaan sa motorsiklo nga gimanihuan sa usa ka Jhon Clifford Bullanday Terez, nga taga Darimco, Barangay West.
Gidala pa sa Dr. Jorge Royeca Hospital ang biktima apan gideklara na kining dead on arrival. Gikustudiya usab sa kapulisan ang driver sa motorsiklo nga nakabangga sa biktima.
Nasayran nga igo ra untang mitambong sa reunion ang pamilya sa biktima dinhi sa Gensan nga gipahigayon sa Barangay Conel, ning dakbayan.
