BACOLOD CITY – Ginreklamo sang isa ka taxi driver ang iya pasahero nga nagkuha sang iya koleksyon kaina sang kaagahon samtang ini ang yara sa sulod sang salakyan halin sa Bacolod City public plaza kag magapadulong kuntani sa Imperial Court sa dalan Gatuslao upod ang iya ginpick-up nga chicks.
Suno sa taxi driver nga may mga las 5 kaina sang kaagahon, ini siya ang ginparahan sang 24-anyos nga suspek kag nagsiling nga mapadul-ong ini sa Imperial Court upod sa 45 anyos nga chicks nga ginkuha sa plaza.
Pahayag sang driver nga sang yara na sila sa area sang dalan Rizal-Gatuslao, iya natalupangdan nga wala na ang iya koleksyon nga kapin 600 pesos.
Didto kag nagreklamo ang driver kag iya ginhambalan ang iya pasahero nga nadula ang iya kwarta kag posible siya ang nakuha bangud siya man lang tawo sa front seat.
Gilayon ini nga gindeny sang pasahero gani naglalisay sila nga duha, tubtub nga gindiretso na lang sang driver sa Police Station 1 ang iya mga pasahero.
Ginpahayag nga wala na nagpa blotter ang taxi driver bangud nag-aregluhanay sila sang iya pasahero.
Nahibaluan nga buot kuntani nga dal-on sang 24 anyos ang lalaki ang iya ginkuha nga chicks sa plaza sa Imperial Court apang ini ang nabulilyaso.
Sa bahin sang 45-anyos nga chicks, ginsiling sini nga indi na siya kuntani mag-upod pa sa lalaki bangud kaagahon na, apang ginpilit gid siya sini kag ginhambalan nga bayaran siya sang 300 pesos, rason nga nagpasugot na lamang si Inday./dyHB BACOLOD
