BACOLOD CITY – Nagdangat sa masobra P14 mil pesos ang bili sang mga kagamitan sang isa ka customer nga nadula sa baggage counter sang isa ka department store sa Bacolod downtown area kahapon sang aga.
Suno sa tag-reklamo nga isa ka 56-anyos nga lalaki nga taga Brgy. Poblacion, banwa sang Valladolid nga ini siya ang nagkadto sa Unitop Department Store sa dalan Gonzaga, Brgy. 12, Bacolod City may mg alas 11:30 kahapon sang aga.
Pahayag sang biktima nga iya ginbilin sa baggage counter ang iya itom nga bag nga naga-unod sang iya mga kagamitan kon diin ginhatagan siya sang tag number 32.
Apang siling sang biktima nga sang buot na niya nga kuhaon ang iya bag, wala na ang tag nga iya ginbutang sa bulsa sang iya pantalon.
Daku ang kakibot sang biktima nga sang iya ginkadtuan sa baggage counter, may nag claim na sang iya bag.
Nahibaluan nga ang unod sang bag sang biktima nagalakip sang branded nga pantalon nagbalor P2,700 pesos, isa ka polo shirt nga nagabalor P1,200, sapatos nga nagabili P8 mil pesos, jacket nga nagabili P1,200 kag duha ka t-shirt nga nagabili P1,200.
Bangud sini, nagdagon dagon sa Police Station 1 ang biktima agud ipa blotter ang natabo sa iya./dyHB BACOLOD
