SIPALAY CITY – (UPDATE) Ginbawian na sang kabuhi ang pasahero sang Ford Everest nga ginkilala lang kay ‘Rex’ sa gin ambush ini sang indi magnubo sa napulo ka mga armado kagab-e sa Sitio Dungga, Barangay Maricalum.
Ini ang ginconfirm mismo sang imbestigador sang Sipalay PNP nga si Police Officer 1 Marc Madayag matapos nga ini ang una narevive pa sa Sipalay Infirmary kag gintransfer sa Kabankalan City District Hospital apang ini ang gin bawian sang kabuhi pasado la una kaina sang kaagahon.
Dugang pa ni PO1 Marc Madayag nga wala pa makilal-an asta sa subong kun sin-o ang matuod nga pangalan sang biktima kag kon taga diin ini.
Ginpahayag naman ni 303rd Brigadier General Benedict Arevalo nga wala sa ila record ang ‘Rex’ nga pangalan.
May mga pasuni nga NPA si Alyas Rex bangod man sa mga dokumento nga narecover sa salakyan.
Suno sa report nga may ginkuha ini nga libro sa Hinobaan nga dal-on kon tani sa Kabankalan.
May mga medical supplies man sa sulod.
Pahayag ni Arevalo nga ara gid man libro ang NPA nga amu ang ila ginagamit sa pagtuon.
Ang salakyan ang iya ni Rosemar Dolatre sang Crossing Ilog, Barangay Canlamay.
Arkilado ini ‘Rex’ dala ang driver kag lisensya may kuhaon lang sa Sipalay. Nakibot man sya gani ngaa nga nakalab-ot pa ini sa Ilog.
Samtang, ara naman sa Corazon Locsin Montelibano Memorial Regional Hospital ang driver sini nga si Jomarie Garcia, 34 anyos sang Kabankalan City kag padayon nga ginabulong.
